Hayseed, 16. mars 2002

Knalltøff kompetanse

FLORØ: Han har spisskompetansen i orden, Terje Kjørlaug. Tilbake på heimebane med sin speilvendte Stratocaster, imponerte den lokale gitarhelten og Oslo-bandet Hayseed stort med hardtslåande og funky rock'n roll.

Arve Solbakken

Ein kanonkveld på Haavebua, reklamerte rockeklubben med på førehand. Dei har sine ord i behald. Denne laurdagskvelden levde klubben opp til namnet sitt.

Ikkje berre var hovudnamnet Hayseed vaskekte vare, men spesielt positivt var tiltaket med å la eit lokalt band varme opp. Laban tok steget opp frå ungdomsklubben Haffen til Haavebua, og avslørte gjennom ein halvtime med sjølvkomponerte låtar at potensialet er stort. Florø-bandet er i stadig utvikling, med markant meir tyngde no etter at Joakim Høyvik overtok mikrofonen.

Mens Laban er på søk, levna vokalist Morten Fredheim og Hayseed ingen tvil om kvar dei høyrer heime. Beina er planta solid i tradisjonen etter legendariske band som Deep Purple, Free og Van Halen. Men dei leverer ikkje berre stilsikre coverlåtar, men også sjølvlaga materiale i den same gata. Så presist, så funky, så dynamisk og drivande at det er til å få makk av. Og Kjørlaug' en framprovoserte "all time high" luftgitarfaktor på Haavebua, særleg blant herremenn på 40 +. Når denne generasjon inntek aldersheimane om 25-30 år, nyttar det ikkje å komme med trekkspel og skillingsviser. Då blir det Hendrix til kaffien og Cream til desserten.